புத்தாண்டு பலன்கள் - 2026 - தனுசு ராசி

 புத்தாண்டு பலன்கள் - 2026 - தனுசு ராசி

 

கணித்தவர்

ஜோதிட மாமணி,

முனைவர் முருகு பால முருகன்

ஆசிரியர் - பால ஜோதிடம் (வார இதழ்)

Dip in astro, B.L, M.A.astro. PhD in Astrology.

No: 19/33 வடபழனி ஆண்டவர் கோயில் தெரு,

வடபழனி, சென்னை - 600 026 தமிழ்நாடு, இந்தியா.

cell: 0091  7200163001. 9383763001

 

தனுசு  மூலம், பூராடம், உத்திராடம் 1ம் பாதம்

நவகிரங்களில் தேவகுரு என வர்ணிக்கப்படக்கூடிய குருவின் ஆதிக்கத்தில் பிறந்த நீங்கள் பிறருக்கு உதவி செய்வதில் முன் நின்று செயல்படக்கூடிய நபராகவும், மற்றவர்களுக்கு வழிகாட்டியாகவும் விளங்கக்கூடிய குணம் கொண்டவராக இருப்பீர்கள். வரும் 2026-ம் ஆண்டில் ராசியாதிபதி குரு பகவான் உங்கள் ராசிக்கு சமசப்தம ஸ்தானமான 7-ம் வீட்டில் 02-06-2026 முடிய சஞ்சரிப்பது அற்புதமான அமைப்பாகும். 7-ல் சஞ்சரிக்கக் கூடிய குரு பகவான் தனது சிறப்பு பார்வையாக ஜென்ம ராசி, 3, 11-ஆகிய ஸ்தானங்களை பார்வை செய்வார். அது மட்டும் இல்லாமல் சர்ப கிரகம், சாயா கிரகம் என வர்ணிக்கப்படக்கூடிய ராகு பகவான் உங்கள் ராசிக்கு முயற்சி ஸ்தானம் என வர்ணிக்கப்படக்கூடிய 3-லும், கேது பகவான் பாக்கிய ஸ்தானம் என வர்ணிக்கப்படக்கூடிய 9-ம் வீட்டிலும் 5-12-2026 முடிய சஞ்சாரம் செய்ய இருப்பது உன்னதமான அமைப்பாகும். உங்களுக்கு வெளியூர் மூலமாக அனுகூலமான பலன்களை அடையக்கூடிய வாய்ப்புகள் உண்டு. நீங்கள் மேற்கொள்ளக்கூடிய முயற்சிகளுக்கு நல்ல ஆதரவு கிடைக்கும். எதிலும் தைரியத்தோடு செயல்படுவீர்கள். உடன் இருப்பவர்கள் ஆதரவு மிகச் சிறப்பாக இருக்கும். பிறருக்கு தந்த வாக்குறுதிகளை எளிதில் நிறைவேற்றக்கூடிய பலம் உண்டாகும். உடன் பிறந்தவர்கள் மூலமாக அனுகூலமான பலன்களை பெறக்கூடிய வாய்ப்புகள் உண்டு. எந்த ஒரு செயலிலும் சாமர்த்தியமாக செயல்பட்டு அடைய வேண்டிய இலக்கை அடையக்கூடிய அதிர்ஷ்டமானது உங்களுக்கு உண்டு.

வரும் 2026-ம் ஆண்டில் முதல் ஐந்து மாத காலங்கள் குருவின் சாதக சஞ்சாரத்தால் பணவரவுகள் மிகச் சிறப்பாக இருந்து மற்றவர்களுக்கு நீங்கள் கொடுத்த வாக்குறுதிகளை எளிதில் காப்பாற்றக்கூடிய ஒரு பலமானது உங்களுக்கு சிறப்பாக இருக்கும். மங்களகரமான சுப காரியங்கள் எளிதில் கைகூடக்கூடிய அதிர்ஷ்டமானது உண்டு. கணவன்- மனைவியிடையே ஒற்றுமையானது மிகவும் சிறப்பாக இருக்கும். உறவினர்கள் ஆதரவு மிகச் சிறப்பாக இருப்பதால் குடும்பத்தில் மகிழ்ச்சி ஏற்படும். நீண்ட நாட்களாக குழந்தை பாக்கியம் இல்லை என்று ஏங்கியவர்களுக்கு அழகிய குழந்தைகளை பெற்றெடுக்கக்கூடிய அதிர்ஷ்டமானது வரும் நாட்களில் உண்டு.

தொழில் வியாபாரத்தில் ஆண்டின் முற்பாதியில் நல்ல லாபத்தை ஈட்டக்கூடிய அதிர்ஷ்டமானது இருக்கிறது. போட்ட முதலை எளிதில் எடுக்கக்கூடிய வாய்ப்பு ஏற்படும். தகுதி வாய்ந்த வேலையாட்கள் உங்கள் தொழிலில் இணைவதால் எந்த பணியும் எளிதில் செய்யக்கூடிய பலம் உண்டாகும். தொழில் வளர்ச்சிக்காக நீங்கள் எதிர்பார்த்த பண உதவிகள் கிடைக்கும். உத்தியோகத்தில் இருப்பவர்களுக்கு பணியில் சிறப்பாக செயல்படுவது மட்டுமில்லாமல் மற்றவர்களால் முடிக்க முடியாத ஒரு காரியத்தை கூட நீங்கள் தலையிட்டு சிறப்பாக செய்து முடிக்கக்கூடிய பலமானது இருக்கும். புதிய வேலைவாய்ப்பை எதிர்பார்த்தவர்களுக்கு பெரிய நிறுவனத்தில் இருந்து அழைப்பு வரக் கூடிய வாய்ப்பானது ஆண்டின் முற்பாதியில் உண்டு.

உங்களது தேக ஆரோக்கியமானது சிறப்பாக இருப்பதால் எதிலும் சுறுசுறுப்பாக செயல்படுவது மட்டுமில்லாமல் கடந்த காலங்களில் இருந்து வந்த மருத்துவ செலவுகள் வரும் நாட்களில் குறைய கூடிய யோகமானது உண்டு. ஆண்டின் முற்பாதியில் ஏற்ற மிகுந்த பலன்களை நீங்கள் பெற்றாலும் வரும் 02-06-2026 முதல் குரு பகவான் உங்கள் ராசிக்கு 8-ல் சஞ்சாரம் செய்ய இருப்பதால் குரு மாற்றத்திற்குப் பிறகு பணம் கொடுக்கல்- வாங்கல் விஷயத்தில் சற்று கவனத்தோடு இருப்பது மிகவும் நல்லது. பொதுவாக 8-ல் சஞ்சரிக்கக்கூடிய குரு சில எதிர்மறையான பலன்களை தரும் என்றாலும் உங்கள் ராசிக்கு குருபகவான் அதிபதி என்பதால் பெரிய பாதிப்புகளை தர மாட்டார். எது எப்படி இருந்தாலும் குரு 8-ல் சஞ்சரிக்கக் கூடிய காலத்தில் ஆடம்பர செலவுகளை குறைத்துக் கொண்டு சிக்கனத்தோடு இருப்பது நல்லது.

தொழில் வியாபாரத்தில் உங்களுக்கு கிடைக்கக்கூடிய சின்ன வாய்ப்பையும் உதாசீனப்படுத்தாமல் சரியான முறையில் பயன்படுத்திக் கொண்டால் ஒரு வளமான பலன்களை அடையக்கூடிய அதிர்ஷ்டமானது உண்டு. இக்கட்டான நேரத்தில் குடும்ப உறுப்பினர்களுடைய ஆதரவு இருப்பதால் எதையும் எதிர்கொள்ளக்கூடிய ஒரு பலமானது உண்டாகும். உத்தியோகத்தில் இருப்பவர்கள் குரு பெயர்ச்சிக்குப் பிறகு பணியில் சற்று பொறுமையோடும், சக ஊழியரிடம் பேசுகின்ற போது சற்று நிதானத்தோடும் செயல்படுவது மிகவும் நல்லது. முக்கிய விஷயங்களை பொது இடங்களில் பேசாமல் இருந்தால் தேவையற்ற பிரச்சினைகளை தவிர்க்க கூடிய வாய்ப்புகள் ஏற்படும். அசையும், அசையா சொத்து வகையில் சுபச் செலவுகளை எதிர் கொள்ளக்கூடிய சூழ்நிலை உண்டாகும்.

ஜூன் மாதத்திற்கு பிறகு 8-ல் சஞ்சரிக்கக்கூடிய குரு பகவான் 31-10-2026 முதல் 25-1-2027 முடிய அதிசாரமாக உங்கள் ராசிக்கு 9-ம் வீட்டில் சஞ்சாரம் செய்ய இருப்பது ஒரு அற்புதமான அமைப்பு ஆகும். அதனால் நவம்பர், டிசம்பர்  மாதங்களில் உங்களுக்கு பொருளாதார ரீதியாக மிகப்பெரிய அனுகூலங்களும், இருக்கக்கூடிய சில இடையூறுகள் விலகி வளமான பலன்களை அடையக்கூடிய ஒரு அதிர்ஷ்டங்களும் உண்டாகும்.

வரும் 2026-ம் ஆண்டில் ஒரு ராசியில் அதிக காலம் தங்கக்கூடிய கிரகமான சனி பகவான் உங்கள் ராசிக்கு திருக்கணிதப்படி சுகஸ்தானம் என வர்ணிக்கப்படக்கூடிய 4-ல் சஞ்சாரம் செய்வதால் உங்களுக்கு அர்த்தாஷ்டமச் சனி நடக்க இருக்கிறது. குறிப்பாக அர்த்தாஷ்டமச் சனி நடைபெற்றால் தேவையற்ற அலைச்சல்கள் ஏற்படும். இருப்பதை அனுபவிக்க இடையூறுகள் உண்டாகும். வசதி வாய்ப்புகள் இருந்தாலும் அதனை சரியான முறையில் பயன்படுத்த தடைகள் ஏற்படும். தாய் வழி உறவினர் வகையில் தேவையில்லாத கவலைகள் ஏற்படலாம். ஒரு சில நேரங்களில் மற்றவர்களுடைய உதவியானது தக்க நேரத்தில் கிடைக்காத காரணத்தினால் உங்களுக்கு வேலைபளு சற்று அதிகப்படியாக இருக்கும். அதிலும் குறிப்பாக வேலையாட்கள் ஒத்துழைப்பானது உங்களுக்கு மனதிருப்தியை அளிக்காது. வண்டி, வாகனங்கள் மூலமாக சுபச் செலவுகள் ஏற்படக்கூடிய ஒரு அமைப்பானது உண்டாகும்.

எது எப்படி இருந்தாலும் உங்கள் ராசிக்கு 3-ம் வீட்டில் ராகு இருப்பதால் எதிலும் துணிவோடு செயல்பட்டு அடைய வேண்டிய இலக்கை அடைவீர்கள். ஜூன் முதல் அக்டோபர் வரை உள்ள காலத்தில் மட்டும் பண விஷயத்தில் சற்று சிக்கனத்தோடு இருந்துவிட்டால் வரும் 2026-ம் ஆண்டில் நல்ல முன்னேற்றத்தை நீங்கள் அடையக்கூடிய ஒரு அதிர்ஷ்டமானது உண்டு. எதிலும் உணர்ச்சி வசப்படாமல் பொறுமையோடு செயல்பட்டால் மிகச் சிறப்பான பலனை அடையக்கூடிய ஒரு வாய்ப்பானது உங்களுக்கு உண்டாகும்.

 

உடல் ஆரோக்கியம்

உங்களுக்கு இருக்கும் வேலைபளு காரணமாக உடல் சோர்வு ஏற்படும் என்றாலும் உங்களது மனோ தைரியத்தால் அன்றாடப் பணிகளில் சுறுசுறுப்பாக செயல்படுவீர்கள். உணவு விஷயத்தில் கட்டுபாடுடன் இருப்பது நல்லது. குடும்பத்தில் உள்ளவர்களால் வீண் மருத்துவ செலவுகள் ஏற்படும். தேவையற்ற பயணங்களை தவிர்ப்பது நல்லது.

குடும்பம் பொருளாதார நிலை

பொருளாதார ரீதியாக ஏற்ற இறக்கமான நிலை இருக்கும் என்பதால் எதிலும் சிக்கனமாக இருப்பது நல்லது. எல்லாம் இருந்தும் அனுபவிக்கத் தேவையற்ற இடையூறுகள் ஏற்படும். கணவன்- மனைவியிடையே ஒற்றுமை சிறப்பாக இருக்கும். குடும்ப உறுப்பினர்கள் மற்றும் உறவினர்களின் ஆதரவால் உங்களது அனைத்து பிரச்சினைகளையும் சமாளிக்க முடியும். ஜுன் மாதத்திற்கு முன்பு திருமண சுப காரிய முயற்சிகளில் மகிழ்ச்சி தரும் நிகழ்வுகள் நடக்கும்.

உத்தியோகம்

மேலதிகாரிகளின் கெடுபிடிகள், வேலைபளு போன்றவைகளால் பல சங்கடங்களை சந்தித்தாலும் எதையும் தைரியத்துடன் எதிர்கொள்வீர்கள். நீங்கள் எதிர்பார்க்கும் பதவி உயர்வுகள் ஜுன் மாதத்திற்கு முன்பு கிடைக்கும். சூழ்நிலையை புரிந்து நடந்து கொண்டால் மேலும் அனுகூலங்கள் ஏற்படும். ஊதிய உயர்வுகள் தக்க சமயத்தில் கிடைக்கும் என்றாலும் குடும்பத்தில் ஏற்படும் வீண் செலவுகளால் தேவையற்ற நெருக்கடி உண்டாகி மன நிம்மதி குறையும்.

தொழில், வியாபாரம்

தொழில், வியாபாரம் செய்பவர்களுக்கு நிறைய போட்டி பொறாமைகள், அலைச்சல், டென்ஷன் உண்டாகும் என்றாலும் எதையும் சமாளித்து ஏற்றம் பெறுவீர்கள். பெரிய முதலீடுகளை ஈடுபடுத்தி செய்ய நினைக்கும் காரியங்களில் ஜுன் மாதத்திற்கு முன்பு செயல்படுத்தினால் நற்பலன் கிடைக்கும். புதிய நவீன கருவிகள் வாங்குவதற்காக கடன் வாங்க நேரிடும். கூட்டாளிகளின் உதவியால் தொழிலில் முன்னேற்றங்களை அடைவீர்கள். வெளியூர் வெளிநாட்டு தொடர்புகளால் சாதகமான பலன் உண்டாகும்.

கொடுக்கல் வாங்கல்

பணவரவுகளில் இழுபறி நிலை, தேவையற்ற இடையூறுகள் ஏற்படும். தேவைகளை பூர்த்தி செய்ய கடன் வாங்க நேரிடும். பிறரை நம்பி வாக்குறுதி கொடுப்பது முன் ஜாமீன் கொடுப்பது போன்றவற்றை தவிர்ப்பது நல்லது. நெருங்கியவர்களின் உதவியால் எதிர்பாராத அனுகூலங்கள் கிடைத்து எதையும் சமாளிக்கும் சூழ்நிலை உண்டாகும். அதிக முதலீடு கொண்ட செயல்களில் கவனமுடன் இருப்பது நல்லது.

அரசியல்

கட்சிப் பணிக்காக நிறைய செலவு செய்ய வேண்டிய சூழ்நிலைகள் ஏற்பட்டு வீண் செலவுகள் அதிகரிக்கும். பேச்சில் நிதானத்தை கடைபிடிப்பது நல்லது. எதிர்பாராத உதவிகளால் பொருளாதார நிலையில் மேம்பாடுகள் உண்டாகி மக்களுக்கு கொடுத்த வாக்குறுதிகளை காப்பாற்ற முடியும். நல்ல வாய்ப்புகள் கிடைக்கும் என்றாலும் வேலையாட்களிடம் சற்று கவனத்துடன் இருப்பது உத்தமம்.

கலைஞர்கள்

கலைஞர்கள் கிடைக்கும் வாய்ப்புகளை பயன்படுத்தி கொண்டு செயல்படுவது நல்லது. மறைமுக எதிர்ப்புகள் மன அமைதியை குறைக்கும். வெளியூர் வெளிநாடுகளுக்கு செல்லும் வாய்ப்பு அமையும். பணவரவுகள் சற்று இழுபறி நிலையில் இருந்தாலும் வரவேண்டிய நேரத்தில் வந்து சேரும். இசை, நாடகம் போன்ற துறைகளில் இருப்பவர்களுக்கும் அனுகூலங்கள் ஏற்படும்.

விவசாயிகள்

பயிர் விளைச்சல் சிறப்பாக அமைய நிறைய பாடுபட வேண்டி இருக்கும். வாய்க்கால் வரப்பு பிரச்சினைகளால் நீர்வரத்து குறையும் என்றாலும் எதிர்நீச்சல் போட்டாவது லாபத்தினை பெறுவீர்கள். பூமி, மனை, வண்டி, வாகனம் வாங்க கூடிய யோகம் ஏற்படும் என்றாலும் அதற்காக கடன் வாங்கும் சூழ்நிலை உண்டாகும். அரசு வழியில் கிடைக்கும் உதவியால் இருக்கும் நெருக்கடிகள் சற்று குறையும்.

பெண்கள்

உடல் ஆரோக்கியத்தில் சிறு சிறு பாதிப்புகள் தோன்றும் என்பதால் உணவு விஷயத்தில் கட்டுபாடு தேவை. உற்றார் உறவினர்களை அனுசரித்து நடந்து கொள்வது நல்லது. குடும்ப விவகாரங்களை பிறரிடம் பகிர்ந்து கொள்வதை தவிர்க்கவும். திருமண வயதை அடைந்தவர்களுக்கு ஜுன் மாதத்திற்கு முன்பு நல்ல வரன்கள் தேடி வரும். நவீன பொருட்கள் வாங்கும் வாய்ப்புகள் உண்டாகும்.

மாணவ மாணவியர்

கல்வியில் முழு முயற்சியுடன் செயல்பட வேண்டிய காலமிது. மந்த நிலை, ஞாபகமறதி போன்றவை ஏற்பட்டாலும் அடைய வேண்டிய இலக்கை எளிதில் அடைய முடியும். பயணங்களில் கவனமுடன் இருப்பது நல்லது. தேவையற்ற நட்புக்களால் வீண் பழிச் சொற்கள் உண்டாகும் என்பதால் எச்சிரிக்கையுடன் செயல்படவும். பெற்றோர் ஆசிரியர்களின் ஆதரவு நன்றாக இருக்கும்.

 

பரிகாரம்

தனுசு ராசியில் பிறந்துள்ள உங்களுக்கு சனி 4-ல் சஞ்சரிப்பதால் சனிக்கிழமைகளில் விரதமிருந்து நவகிரகங்களில் உள்ள சனி பகவானுக்கு அர்ச்சனை செய்வது, கருப்பு துணியில் எள்ளை மூட்டை கட்டி, அகல் விளக்கில் வைத்து நல்லெண்ணெய் ஊற்றி தீபமேற்றுவது நல்லது. கருப்புநிற ஆடை அணிதல், கைக்குட்டை பயன்படுத்துவது நல்லது. எள், கடுகு, தோல் பொருட்கள், சமையல் பாத்திரங்கள், குடை, அடுப்பு போன்றவற்றை ஊனமுற்ற ஏழை எளியவர்களுக்கு தானம் செய்யலாம்.

உங்களுக்கு வரும் 02.06.2026 முதல் குரு 8--ல் சஞ்சரிப்பதால் வியாழக்கிழமை தோறும் குரு பகவானுக்கு கொண்டை கடலையை மாலையாக கோர்த்து அணிவித்து, மஞ்சள் நிற மலர்களால் அலங்கரித்து, நெய் தீபமேற்றி வழிபடுவது நல்லது. ஏழை, எளியவர்களுக்கு உதவி செய்வது, மஞ்சள் நிற ஆடைகள் அணிவது நல்லது. புஷ்பராக கல் அணிவது நல்லது.

 

அதிர்ஷ்டம் அளிப்பவை

எண் - 1,2,3,9        நிறம் - மஞ்சள், பச்சை        கிழமை - வியாழன், திங்கள்

கல் - புஷ்ப ராகம்             திசை - வடகிழக்கு                  தெய்வம் - தட்சிணா மூர்த்தி